Naftalan bölgələrə üz tutan xarici turistlərin coğrafiyasına görə liderdir.
2017-ci ildə Naftalanın istirahət-əyləncə və sağlamlıq mərkəzləri 62 ölkədən 7 min 309 nəfər xarici turist qəbul edib. Bu, həm 2016-cı illə müqayisədə 2266 nəfər çoxdur, həm də paytaxtdan sonra bölgələrə üz tutan xarici turistlərin coğrafiyasına görə ən yüksək göstəricidir. Həmin mərkəzlərdə il ərzində daha çox Rusiya, Qazaxıstan, Özbəkistan, Türkiyə və Ukraynadan olan turistlər istirahət edib, yaxud müalicə alıblar.
Həmçinin Naftalanın istirahət mərkəzləri ötən il ilk dəfə olaraq dünyanın bütün qitələrindən və ayrı-ayrı regionlardan turist qəbulunu həyata keçiriblər.Ötən il Naftalanın möcüzəvi müalicə əhəmiyyətli neft vannalarında ilk dəfə olaraq Asiya qitəsindən Yaponiya, Cənubi Koreya, Çin, Hindistan, Kamboca, Yeni Zelandiya, Filippindən, Amerika ölkələrindən Kanada, Meksika, Braziliya və ABŞ-dan, Afrika respublikalarından, hətta uzaq Avstraliyadan gələn turistlər sağlamlıqlarını bərpa ediblər.
2017-ci ildə Naftalanın bütün otelləri və sağlamlıq mərkəzləri yüksək göstəricilərlə fəaliyyət göstərib. Bu mərkəzlərdə istirahət edənlərin sayının ildən-ilə artmasına təsir göstərən amillərdən biri də ötən illərdə burada müalicə alan turistlərin yenidən Naftalanı seçməsi ilə əlaqədardır.
“Hətta elə turistlər var ki, onlar hər il Naftalana gəlirlər. Bir dəfə Naftalana gəlib, təkrar burada müalicə almaq istəməyən turist tapmaq çətindir. Elə xarici turistlər də var ki, onlar vaxtilə Naftalanda müalicə almış və neft vannasının möcüzəvi təsiri ilə öz sağlamlıqlarını tamamilə bərpa edən insanların ailə üzvləri, yaxın qohumları və ya dostlarıdır”.
Turistlərin sayındakı artımı və tələbatı nəzərə alaraq Naftalan şəhər İcra Hakimiyyəti tərəfindən yeni sağlamlıq-istirahət mərkəzləri açmaq istəyən sahibkarlara dəstək göstərilir. Hazırda şəhərdə iki otelin və bir müalicə mərkəzinin fəaliyyətə başlaması üçün aparılan işlər yekunlaşmaq üzrədir.
