Naftalan şəhərində 2014-cü ilin yekunları müzakirə olundu.
27 fevral 2014-cü il tarixdə Naftalan şəhərinin sosial-iqtisadi inkişafı ilə əlaqədar 2014-cü ildə görülmüş işlər və 2015-ci ildə qarşıda duran vəzifələrə dair geniş Şura iclası keçirilmişdir. Tədbirdə şəhərin hüquq mühafizə orqanlarının, idarə, müəssisə, təşkilatların rəhbərləri,Prezident Administrasiyasının məsul işçisi Vəfadar Bağırov, Millət vəkili Mahir Aslanov və şəhər ictimaiyyətinin nüamayəndələri iştirak edirdi.
Tədbir iştirakçıları əvvəlcə Ümummilli lider Heydər Əliyevin abidəsi önünə gül-çiçək dəstəsi qoymuşlar.
Heydər Əliyev Mərkəzində davam edən tədbirdə məruzə ilə çıxış edən Naftalan şəhər İcra Hakimiyyətinin Başçısı Natiq Aslanov ötən il Azərbaycan Respublikasının Prezidenti cənab İlham Əliyevin rəhbərliyi altında Respublikanın sosial-iqtisadi inkişafı sahəsində əldə olunmuş nailiyyətlər barədə məlumat vermiş, 2014-cü il ərzində şəhərdə görülmüş işləri təhlil edərək həlli vacib olan problemlərin aradan qaldırılması yollarından danışmışdır.
Qeyd edilmişdir ki, Respublikamızda aparılan uğurlu sosial-iqtisadi siaysət nəticəsində digər bölgələr kimi, Naftalan şəhərinin də hərtərəfli inkişafı üçün böyük işlər görülmüş və bu gün də davam etdirilir. 2014-cü ilin yekun statistik göstəricilərinə nəzər salsaq görərik ki, hesabat dövründə qarşıya qoyulmuş vəzifələr uğurla icra olunmuşdur.
Ümumi məhsul buraxılışı 12814.3 min manat, iqtisadiyyatın aparıcı sahəsi olan sənaye istehsalı ötən illə müqayisədə 13 faiz artaraq 1709.6 min manat, tikinti-quraşdırma işlərinin həcmi isə 5405.9 min manat təşkil etmişdir. Əhaliyə 263.4 min manatlıq nəqliyyat xidməti göstərilmişdir. Əhalinin həyat səviyyəsini xarakterizə edən əsas göstəricilərdən biri olan pullu xidmətlərin həcmi 18 faiz artaraq 13502.1 min manat olmuşdur. Pərakəndə əmtəə dövriyyəsinin həcmi 15464.2 min manat, bir işçiyə hesablanmış orta aylıq əmək haqqı isə 2013-cü illə müqayisədə 10 faiz artaraq 282 manat, hüquqi və fiziki şəxslərə göstərilən informasiya və rabitə xidməti isə 9 faiz artaraq 198.8 min təşkil etmişdir.
Şəhərin yerli büdcəsi subsidya ilə birlikdə 4114.7 min manat, xərcləri isə 3634.2 min manat olmuşdur. Yerli mənbələrdən gəlir üzrə daxil olma 2488 min manat planlaşdırıldığı halda 3327.7 min manat, yəni nəzərdə tutulduğundan 33 faiz artıq olmuşdur. Bütövlükdə yerli büdcənin illik icrasına 93.9 faiz əməl olunmuşdur.
Əhalinin Sosial Müdafiəsi Mərkəzi tərəfindən 121 ailəyə ünvanlı dövlət sosial yardım təyin edilmiş, bir ailəyə düşən yardımın məbləği 118 manat təşkil etmişdir. 11 Çernobl əlilinə müalicə üçün, 20 imkansız əlilə isə 3 dekabr əlillər günü münasibətilə birdəfəlik maddi yardım verilmişdir. Müxtəlif kateqoriyalı 4 əlil Nazirlik tərəfindən pulsuz avtomobillə təmin olunmuşdur.
Dövlət Sosial Müdafiə Fondunun şəhər şöbəsi tərəfindən 2014-cü il ərzində 90 nəfərə müvafiq kateqoriyalar üzrə pensiya təyinatı aparılmışdır. Ümumilikdə pensiyaçıların sayı 1419 nəfərdir. Şöbənin ümumi xərcləri 3042.2 min manat olmuşdur. Pensiya, müavinət və sosial yardımlar vaxtlı-vaxtında ödənilmişdir.
Daha sonra hesabat iştirakçılarına məlumat verilmişdir ki, Tam orta məktəblərin maddi-texniki bazası gücləndirilmişdir. 2013-2014-cü tədris ilində məzunların 40 nəfəri ali məktəblərə qəbul imtahanlarında iştirak etmiş, onlardan 17 nəfəri tələbə adını qazanmışdır. İki nəfər 600-dən, bir nəfər 500-dən, iki nəfər isə 400-dən yuxarı bal toplamışdır. Cənab Prezidentin müvafiq sərancamı ilə təhsilin inkişafında xidmətlərinə görə “Tərəqqi” medalına layiq görülmüş müəllimlərdən biri də Naftalan şəhər məktəbində çalışır. Əlbəttə bütün bunlar sevindirici haldır, lakin məktəblərdə şagirdlərin bilikləri aşağı səviyyədədir. Məhz bunun nəticəsidir ki, ali məktəblərə qəbul, imtahanlarda iştirak edənlərin 42 faizini təşkil etmişdir. Bu səbəbdən də ümumtəhsil məktəblərinin rəhbərlərinin məsuliyyətini artırmaqla tədrisin keyfiyyətini yüksəltməli və daha uğurlu nailiyyətlər əldə olunmalıdır.
Ötən il əhalinin sağlamlığının qorunması və göstərilən tibbi xidmətin keyfiyyətinin yaxşılaşdırılması üçün bir sıra zəruri tədbirlər görülmüşdür. Yoluxucu xəstəliklərə qarşı mübarizə aparılmış və qorxulu yoluxucu xəstəlik qeydə alınmamışdır. 1400 nəfər imtiyazlı xəstəyə güzəştli dərman preparatları verilmiş. Ölkə başçısının tapşırığına əsasən fevral-may aylarında əhalinin kütləvi tibbi müayinəsi həyata keçirilmişdir. Müayinələrin yüksək səviyyədə təşkili və vətəndaşların rahatlığı üçün xəstəxanada bütün lazımi şərait yaradılmışdır. Talassemiyalı xəstlərə kömək məqsədilə qanvermə aksiyası keçirilmiş, könüllü olaraq 150 nəfərdən qan analizi götürülmüşdür.
Bunula yanaşı bu sahədə müəyyən çatışmazlıqlar var və bu da vətəndaşların haqlı olaraq narazılıqlarına səbəb olur. Belə ki, şəhər xəstəxanasının xidmət sahəsi olan təcili tibbi yardım məntəqəsində əmək intizamı tələb olunan səviyyədə deyil. Ona görə də, bu cür xoşagəlməz hallara birdəfəlik son qoyulmalı, rəhbərlik və tibb kollektivi göstərdikləri xidmətin səviyyəsini artırmalı, işlərinə məsuliyyətlə yanaşmalıdırlar. Bildiyiniz kimi şəhər Xəstəxanası uyğunlaşdırılmış binada fəaliyyət göstərir. Lakin, ölkə başçısının Sərəncamına əsasən əhaliyə göstərilən tibbi xidmətin yeni tələblər səviyyəsinə çatdırılması məqsədilə hazırda şəhərdə yeni xəstəxananın tikintisi işləri davam etdirilir.
Hesabat dövründə şəhərin mədəni həyatı da zənginləşmişdir. Ulu Öndərin həyat və fəaliyyətinin, zəngin dövlətçilik irsinin öyrənilməsi məqsədilə Heydər Əliyev Mərkəzində illik iş planı əsasında ardıcıl iş aparılmışdır. Ötən dövr ərzində Ümummilli lider Heydər Əliyevin həyat və fəaliyyətini oyrənmək məqsədi ilə 3900 nəfər mərkəzə ekskursiya etmişdir ki, onlardan 120 nəfəri xarici vətəndaş olmuşdur. Şəhər İcra Hakimiyyətinin, Mədəniyyət və Turizm şöbəsinin təşkilatçılığı ilə mühim tarixi hadislərə, bayramlara həsr olunmuş tədbirlər keçirilmişdir. Bir məsələni də qeyd etməliyik ki, şəhərdə mədəniyyət obyektlərinin vəziyyəti ürəkaçan deyil və hazırda mədəniyyət sahəsi üzrə göstərilən xidmətlər şəraiti olmayan uyğunlaşdırılmış binalarda həyata keçirilir. Bu da öz növbəsində onların fəaliyyətinin günün tələbləri səviyyəsində təşkilinə mənfi təsir göstərir. Qeyd olunanları nəzərə alaraq tərəfimizdən yeni mədəniyyət obyektlərinin tikintisi üçün aidiyyatı orqanlara müraciət edilmişdir.
Yeniyetmə və gənclərlə işin təkmilləşdirilməsi də şəhər İcra Hakimiyyətinin diqqət mərkəzində olmuşdur. Gənclər və İdman idarəsi tərəfindən idmanın inkişaf etdirilməsi və gənclərlə işin təşkili istiqamətində müəyyən işlər görülmüşdür. Ayrı-ayrı idman növləri üzrə müxtəlif yaş qrupları arasında idman tədbirləri keçirilmiş, şəhər birinciliyinin qalibləri Respublika miqyaslı yarışlarda çıxış etmişlər. Lakin, əldə olunmuş nəticələr onu deməyə əsas verir ki, bu sahəyə diqqət daha da artırılmalıdır ki, şəhərimizin idmançıları respublika və beynəlxalq yarışlarda şəhərimizi layiqincə təmsil edərək yüksək nailiyyətlər əldə etsinlər. Buna görə də Gənclər İdman idarəsinin rəhbərliyi şəhərdə idmanın kütləvililiyinin artırılmasında əsaslı dönüş yaratmalı və gənclərlə işi daha yüksək səviyyədə aparmalıdır.
Ölkəmizin hər yerində olduğu kimi Naftalan şəhərində də genişmiqyaslı abadlıq və yenidənqurma işləri davam etdirilmişdir.
Şəhərin su təchizatı sisteminin və kanalizasiya şəbəkəsinin tikintisi, eləcə də yağış sularının axıdılması üçün yeni xətlərin çəkilişi işləri 2014-cü ildə də davam etdirilmişdir. Dövlət Proqramlarına uyğun olaraq şəhərdə kommunal sahədə demək olar ki, bütün işlər başa çatdırılmışdır.
Yalnız, elektrik təsərrüfatı sahəsində bəzi işlər yarımçıq qalmışdır ki, bu işlərin də davam etdirilməsi Dövlət Proqramında nəzərdə tutulub. Kurort şəhəri kimi Naftalanın abadlaşması, inkişaf etməsi bir həyat tərzinə çevrilmişdir.
Dövlət Proqramlarında nəzərdə tutulmuş tədbirlərlə paralel şəhərin sosial-iqtisadi inkişafı üçün vacib olan bir sıra işlərdə həyata keçirilmiş və bu gün də davam etdirilir. Cənab Prezidentin şəhərimizn sosial-iqtisadi inkişafı məqsədilə imzaladığı müvafiq Sərəncamlara əsasən çoxmənzilli yaşayış binalarının fasadı milli memarlıq üslübunda ağlay daşla üzlənib, dəhlizləri təmir olunub, dam örtükləri xüsusi dizaynla yenidən qurulub və işıqlandırılıb. Artıq ötən ilin son aylarından binaların ətrafında və küçələrdə abadlıq işlərinə start verilmişdir. Şəhərdaxili yollara yeni bardürlər düzülmüş və yeni asfalt örtüyünün salınması işlərinə başlanılmışdır. Şəhər İcra Hakimiyyətinin təşkilatçılığı ilə iməcliklər təşkil edilmiş, parklarda abadlıq işləri aparılmışdır. “Ümumrespublika Yaşıllaşdırma” marafonu çərçivəsində genişmiqyaslı ağacəkmə aksiyası keçirilmiş və şəhərin müxtəlif ərazilərində 5000 müxtəlif növ həmişəyaşıl ağac əkilmiş və ağacların suvarılması üçün xüsusi su maşınları cəlb olunmuşdur. Ümumilikdə il ərzində 25000-ə yaxın ağac və dekortiv gül kolları əkilmişdir.
6 km uzunluğunda Naftalan-Qaşaltı Qaraqoyunlu avtomobil yolu əsaslı təmir olunmuşdur. Yola yeni bardürlər düzülmüş, suötürücülər tikilmiş, piyadaların rahat gediş-gəlişi üçün yeni səkilər salınmış, kəndin giriş-çıxışında yeni dayanacaq tikilərək əhalinin istifadəsinə verilmişdir.
Payız-qış mövsümünə hazırlıqla əlaqədar konkret vəzifələr müəyyənləşdirilərək icra edilmişdir. İstilik təsərrüfatında cari təmir işləri aparılmışdır ki, bunun da nəticəsində qış mövsümündə əhali, məktəblər, körpələr evi-uşaq bağçası fasiləsiz olaraq istilik enerjisi ilə təmin edilmişdir.
Əhalinin təhlükəsizliyi tədbirləri istiqamətində də müvafiq işlər görülmüş, hər il yağan güclü leysan yağışlar zamanı yaranan sel sularının dağdıcı təsirinin qarşısının alınması məqsədilə Qaşaltı Qaraqoyunlu kəndində mövcud suni göl təmizlənmiş və hazırda göldə ümumi uzunluğu 163.3 p/m olan dəmir-beton qoruyucu bəndin tikintisi işləri davam etdirilir.
Ötən il yeni avtovağzal otel komleksinin, Polis şöbəsinin və Naftalan Bələdiyyəsinin yeni inzibati binalarında tikinti işləri davam etdirilmişdir.
2014-cü ildə sosial-iqtisadi sahədə əldə olunmuş uğurlar, sovet dönəmindən əhalini narahat edən bir sıra sosial problemlərin uğurlu həlli istiqamətində aparılan işlər bir daha onu göstərir ki, Naftalanda inkişaf dinamik xarakter daşıyır və bütün sahələri əhatə edir.
Hüquq-mühafizə orqanları vətəndaşlarımızın hüquq və azadlıqlarının təmin edilməsi, ictimai asayişin qorunması sahəsində ardıcıl iş aparmış və bu dövrdə şəhər Polis şöbəsində 28 cinayət hadisəsi qeydə alınmışdır. Cinayətlərin açılması 100 faiz təmin edilmişdir.
Həmçinin qeyd olundu ki, Ölkə rəhbərinin vətəndaş-məmur münasibətləri ilə əlaqədar verdiyi tapşırığa əsasən şəhərdə çalışan dövlət qulluqçularının bu sahədə məsuliyyətlərinin artırılması məqsədilə onların qarşısına konkret vəzifələr qoyulmuşdur. Ən mühüm vəzifə isə haqlı şikayətlərin operativ qaydada həlli və vətəndaşların problemlərinə həssaslıqla yanaşılması olmuşdur.
2014-cü ildə ŞİHB aparatına 164 müraciət daxil olmuşdur. 69-u dövlət orqanlarından və digər qurumlardan, 95-i isə vətəndaşlardan bilavasitə şəhər İcra Hakimiyyətinə ünvanlanan müraciətlərdir. Şəhərin bütün idarə, müəssisə və təşkilat rəhbərlərinin iştirakı ilə İcra Hakimiyyəti başçısı tərəfindən yerlərdə keçirilmiş 21 görüş-qəbulda 72 nəfər, İcra Hakimiyyəti aparatında isə 138 nəfər vətəndaş qəbul edilib dinlənilmişdir. Hər bir müraciətə qanunla müəyyən olunmuş müddətdə baxılmış, vətəndaşlar tərəfindən səsləndirilən hər bir məslənin yaranma səbəbləri araşdırılmış və cavab verilmişdir.
Natiq Aslanov çıxışının sonunda demişdir ki yola saldığımız 2014-cü il Naftalan şəhəri üçün sosial-iqtisadi sahədə qazanılan bir çox uğurlarla yadda qalan olmuşdur. Xüsusilə 2014-cü ilin oktyabr ayının 17-də Prezident cənab İlham Əliyevin və xanımı Mehriban Əliyevanın şəhərimizə səfəri sakinlərimizin hədsiz sevincinə səbəb olmuşdur. Ümumiyyətlə edilən səfərlər ölkə başçısının Naftalan kurort şəhərinə olan diqqət və qayğısının təzahürüdür. Prezidentimizin bu səfəri də hər zaman olduğu kimi yeni obyektlərin açılışı, eləcə də əhali ilə görüşü şəhər sakinlərinin yaddaşında silinməz izlər buraxmışdır. Həmin gün beynəlxalq səviyyəli 264 yerlik “Qarabağ SPA and Resort” otel kompleksinin açılışı olmuşdur. Hazırda bu oteldə 100 nəfərə yaxın vətəndaş daimi işlə təmin olunmuşdur. Səfər çərçivəsində Dövlət başçısı və xanımı Mehriban Əliyeva “Naftalan Hotel by Rixos” otelinin yeni korpusunda yaradılan şəraitlə də tanış olmuşlar.
Həmçinin Ölkə başçısının tapşırığına uyğun Naftalanda son illər turizm sahəsində aparılmış islahatlar şəhərimizə Azərbaycandan kənarda da marağın artmasına səbəb olmuş, digər ölkələrin kurort şəhərləri 2011-ci ildən başlayaraq Naftalan şəhəri ilə beynəlxalq əlaqələr qurmağa başlamışdır. Belə ki, Naftalan şəhəri 2011-ci ildə Fransanın Leql, 2013-cü ildə İtaliyanın Pozitano, 2014-cü ildə isə Rusiya Federasiyasının Yessentuki və Polşanın Uneyov şəhərləri ilə əməkdaşlıq etməyə başlamışdır.
Hesabat yığıncağında qarşıda duran vəzifələr də təhlil olunmuş və bildirilmişdir ki, artıq bir gündə 2000 nəfərə yaxın turist qəbul etmək gücünə malik olan şəhərimizə gələn turistlərin sayı son illərlə müqayisədə 5-6 dəfə artaraq 15 mini keçmişdir.
Azərbaycan Respublikası regionlarının sosial-iqtisadi inkişafı Dövlət proqramlarının icrasına həsr olunmuş konfransda cənab Prezidentin qeyd etdiyi kimi, Naftalanın keçmiş şöhrəti bərpa edilir. Naftalan vaxtilə Ümumittifaq turizm mərkəzi idi. Bu gün isə beynəlxalq turizm mərkəzinə çevirilir.
Göründüyü kimi, şəhərimiz özünün inkişafının yeni mərhələsinə qədəm qoyub. Burada aparılan hər bir tikinti, quruculuq işi Naftalan kurortunun şöhrətini özünə qaytarır, müasir kurort şəhərinə çevririr və biz gələcəkdə daha böyük inkişafın şahidi olacağıq. Mən fürsətdən istifadə edərək bir daha naftalanlılar adından möhtərəm Prezidentimizə dərin minnətdarlığımı bildirir və əmin edirəm ki, bundan sonra da Naftalanın davamlı sosial-iqtisadi inkişafı üçün var gücümüzü səfərbər edəcəyik.
Hesabat məruzəsi ətrafında çıxış edənlər əldə olunmuş uğurlardan, mövcud problemlər və onların aradan qaldırılması yollarından danışmışlar.
Sonda iştirakçılar adından ölkə başçısı cənab İlham Əliyevə müraciət oxunmuşdur.
